شايفنى

شايفنى فى المسافه البعيده
نايم على رمل سخن عريان
مشدود بحبال الريم الطالع
مع اخر موجه
من بحر العرق النازف من جلدى
..............................................
شايفنى فى المرايه المكسوره
عيل بوش مشروخ
ممسوخ جوايا الطفل
لا انا عشته ولا هو عاشنى
...............................................
شايفنى انا وهى

هى الوحيده اللى بتعرفنى
جنب قلبى
بتنام جوه عروقى
من اول طلوع الشمس لحد مانام
تبوسنى فى شفايفى
اشكيلها ماتملش
تحكيلى عن نارها
واحكيلها عن نارى
يااااااااه
استحملتنى كتير
بس عمرها ما رفضتنى
عمرها ما قالت لاء
تد ينى زهره عمرها وتتحرق
ماتئنش
ارسمها فى الهوا دواير
حايره وطايره
من غير ترتيب
بجد سجارتى هى حبيبتى
...................................
شايفنى بعجن تراب الشارع بالميه
اعمل طينه
واشكل وش البنت
عيون ورموش
وخدود وشفايف
وانا شايف
ان الطينه مش شبه البنت
ولا شبه الولد اللى بيعمل طينه فى نص الشارع
لا مش شايف
.........................................................
شايفنى وانا بعلم وشى
بخط الحزن على جبينى
مكشر
من الصبح لاخر الليل
لكن عمر قلبى
ماكشر
...................................
شايفنى ولا مش شايفنى ؟

كراسه رسم

ارتبنى على اسمك وعلى المرايا فى عينيكى اكتب ملامحى من جديد طفل صغير يعشق فيكى الابتسامه ويداعب شعرك فى لحظه الاحتضان وينام بين كفيكىطفل صغير ارتبنى على اسمك والمرايا فى عينيكى ولد يعشق ان يرسمك على كراسه الرسم هى امى لا هى حبيبتى لا هى بنت الجيران لا هى الشمس وانا البحر اقسم لكى يا كراستى اننى اعشق هذا الوجه دون ان المسه هى حبيبتى ولا شىء سوى اننى الولد الصغير ارتب نفسى على اسمك والمرايا فى عينيكى بنتى قالت : ابى علمنى معنى ان اكون انثى قلت رتبى نفسك على مرايا حبيبتى التى لم تعلمنى سوى انتظار وجهها الذى لم اراه قالت بنتى : ابى لا تعلمنى ان اعشق وهمك ولا تعلمنى ان انام فى احضان الانتظار علمنى ان اكون حبيبه لولد يعشق فى ملامحى ويعشق مرايا عيناى قلت : حبيتى لم تكن الا حروف ولم تعلمنى الا عشق روحها وانا لا املك ان اعلمك سوى الانتظار .................................................. ..................................................

من غير ملامح

واقف ضهرى للشمس
ولا الشمس واقفه ورا ضهرى

عايز احدد ضلى على الارض
مش قادر
كل ما وطى يرووووووح الضل
عايز احددنى وانا قاعد
صباعى مش طايل ضلى
مش قادر
احددنى وانا نايم
اتمدد على الارض
مش قادر
لازم حد يحددنى
يرسمنى
من راسى لحد رجلى
يبل ايده فى حبر الضل
ويحد د نى
عايز اشوفنى
وانا نايم , وانا قاعد , وانا واقف ,
مش لاقى حد يحد د نى
وانا مش قادر احد د نفسى
..................................................
حطت الكراسه جنبى
علمنى ..... ؟
اعلمك ايه ؟
الحروف
اكتب اسمك
لا .... استنى
اكتب اسمى ... لا
اسم امى
الف .... بدايه الحروف
تبصى جوه عنيها متعرفيش الخوف
سين ..... سنين عرفت تكتب على ملامحها
ازاى تداوى الجرح وتبتسم
ميم ...... مين يقد ر ؟
مين يقد ر ؟
انا الوحيد اللى سكن جواها
وعرف تفاصيلها
الف ..... تانى
تااااااااااااااااانى ؟
اول شىء تشوفيه ساعة ما تبوصيلها
صورتى جوه عنيها
عارفه ليه؟
ليه ؟
علشان انا اول حد حد د بصباعى ملامحها
همزه ....ده اخر حرف
بس بيوجعنى اوى
اه اه اه
بدور عليها ومش طايلها
بس ده مش اسم امى
اعتبرينى غلطت
تعالى نكتبه من الاول
لا مش عايزاك تعلمنى
كسرت القلم
ورمت كراستها
..............................................
اتنفس ريحة الدم
عجابك ؟
وريحة الجلد ؟
ايه رائيك فيها ؟
حلوه مش كده ؟
ممكن تعبيلى قزازه منها
علشان اغسل جسمى بيها
قبل ماموت وتوزع ريحتى لغيرى
عارف اسم الريحه ايه ؟
اسمها ..... مش هاتصدق ....
أ حمد
....................................................

علشان من غير تفاصيل
ومن غير ملامح
بتضيييييييييع
...................................................

صوره وقرايه وببساطه كده واعتراف

صوره

.............

رجاله بعمم وشناب عاملين دايره

وكوم رمل فى النص

ينفخوا فى اديهم ويفتلوا

رمل من صوابع رجليهم

لحد الكف

من سنين وهما كده

لحد دلوقتى مفيش حبل رمل اتلف

..................................................

ببساطه كده

...............

تروح البنت جوه مرايه ليل

وتفتش جوه تفاصيلها

عن عنوان للاماكن

اللى عمر ما حد زارها

البنت كبرت

والاماكن اتغيرت ملامحها

وانا واقف جوه عنيها

لانى ببساطه كده كنت مرايتها

.................................................

قرايه

........

بفتح الجرنان

اقرا حظى

واشرب قهوه

وادخن سيجاره

واقوم

بقعه دم على بنطلونى

البقعه تزيد

وتزيد

وتزيد

ت

ذ

ي

د

الجرنان بينزف دم

انفجر جواه وريد

...................................

اعتراف

............

انا ولا حاجه

.......................................................................

مفيش داعى

مفيش داعى تبص فى المرايه النهارده
ملامحك مسافره
ورموشك شايله عفار الحزن
ضلوعك متشوشره بالشروخ
مش طايل حتى النفس
يااااااااااااااااااه ايه الالم ده ؟
...................................................

عريان

عريان واقف لوحدى بتفرج
على صورتى
دى صورتى ؟
بشوفك مليون مره فى المرايه
مش بعرفك
كل مره بشكل
كل مره بلون
دى صورتى ؟
..............................................................
حط ايدى فين ؟
عايز دم
طب حط الابره
وخليها تشد نفس عميق من عروقى
حطيت ؟
ايه ؟
متقولش مالقيتش دم
اه اه
صحيح افتكرت
اصلى انا موت
.............................................................................................
صورتك . ورقم تليفونك . وعنوانك .ا صلك وفصلك
لون عنيك
لون جلدك
تفاصيل شعر جسمك
تجاعيدك
منحنياتك تداويرك
مين اللى زارك فى احلامك
ومين اللى نام على كتفك
مين ساب ريحة عرقه جوه قميصك
مين ؟
مين ؟
مين اللى نامت جوه ضلوعك اخر مره
الصراحه
مش فاكر
الحاجه الوحيده اللى انا فاكرها
انى مولود من غير وطن
..................................................................................
افتكرت صوتها
وعيونها
فاتصلت
كانت مش هى
يا اما باعت التليفون
يا اما انا من عيونها
ضعت
..............................................................................................
مش عارف غير انى اكل فى نفسى

روحى راحت

واقف على الناحيه التانيه من ناصية روحى
مستنى صوتى
مستنى حروفى
تعدى ......... لكن ما بتعديش...
من مزلقان حنجرتى
مكتومه ... الكلمه
مقتول الحرف
...........................................................
سنين وانا برسم صور
وشى ... وش ابويا ... وش البنت
دلوقتى مش برسم غير وش القهوه
وسجارتى
لما اطفيها فى طفايه روحى
.................................................................
عاشق
منير كن يهز كيانى
بعاشق اعشقنى
كاره اكرهنى
لكن اسمعنى ........... حاااااااااااااااااا
لكن متغيرتش
معرفتش غير الذكرى
بتهد كيانى
وتبهدل روحى لما اسمع ممكن ...
..................................................................
اخدت نفس من سيجارتها
ملت الكاس بمنقوع براطيش
ونفخت فى الهوا روحى
قالت ..... انت عبيط
متعرفش تداوى جروحى
وعبت من الهوا ايدها
ورشتنى بالكاس.... اترجت روحى
وعرفت ساعتها
انى مش ليها
وان روحى راحت مع دخان سيجارتها
.....................................................................

عشرين قلم على سهوا

ههههههههههههههه ا فتكرت لما كنت بئدى الخدمه العسكريه فى احدى المدن الساحليه .. زميلى فى الخدمه كانوا بيقولوا عليه مطوع من كتر الالتزام يعنى مش عارف ايه كمية الالتزم اللى كانت نازله عليه دى افتكرت احمد ذكى فى فيلم البريىء ... المهم ... نا من ساعة ما دخلت الجيش وانا مسيبتش خدمه واحده الا ووقفتها ووقفتها على حق ... اترقيت فى ا لجيش برتبة امباشه مجند حاجه كده تفرح ابوك وامك فى قبرهم .... بعد ماترقيت طبعا بعد حولى سنه من دق الطوب فى الشارع علشان نبنى شاليه للرائد اللى جاى جديد علشان هو ناوى يصيف هنا السنه اللى جايه ومعاه المدام .... طبعا الخدمه كانت تالت انواع انا كنت بحب الخدمه الاخيره علشان كنت بسهر اكتب شعر وكنت بحب اقرا
وفى يوم انا طبعا وزعت الخدمه وكان عليه انا خدمه لان كان فى نقص فى الناس اللى جات جديد يعنى انا كنت من ضمن الخدمه فى اليوم ده وكنت ناوى امسك خدمتين ورا بعض انا كده بحب السهر ... الساعه عشرمساءا وقفت الخدمه بتاعتى وكانت هى (الشنجى)يوب وقفت خمس دقيق اوعشر دقيق وكان الظابط فى دوريه بره لظابط ده كان من خريج مدرستين مدرسة 5 يونيه ومدرسة 6 اكتوبر المجيده يعنى ممكن يكون عامل ازاى ؟؟؟؟؟؟؟؟ انت ممكن تشوفوه انسان عادى انسان عادى جدا بس والله مش عادى كمية امراض نفسيه وكمية عقد مش ممكن اخيلها او او صفها كان سعادته بره وانا كنت واقف الخدمه وجانى واحد من العساكر الجداد ... امباشه (مسافه) .... ايوه ؟ قالى ماتيجى تاكل لقمه ... قولتوله لاء .... يعم تعالى بسرعه ورجع ... المسافه من المكان ا للى فيه الخدمه والميز كام ؟ عشره متر تقريبا قولت بصوا انا هاعمل ساندوتش وامشى...... يداوب بحط حتة الجبنه فى السندوتش وقلتيت اظابط ذو العهدين واقف قدامى ... سائل سؤال فى منتهى البراءه .... مين اللى واقف خدمه بره ؟ طبعا الناس اللى كانت قاعده على لترابيزه كلهم جداد يعنى عيالى فى الجيش وانا الاومباشا الكبير بتاع اليله دى رحوا قاموا واقفين كلهم فى لحظه واحده وان طبعا قولت فى صوت مبحوح .... انا... قالى انت ؟ قولت ايوه يا فندم انا ... انا طبعا واقف وشى فى وشه بالظبط .... قلى انت الاموباشا الكبير مش كده ؟ قولتلته ايوه يا فندم ... طبعا شتم امى ... الله يرحمها ... وبصيت لقيت كمية اقلام نزلت على وشى وانا واقف على بلاطه واحده فى الارض متحركتش ولا عملت اى رد فعل .... الراجل ده مسك ايده من كتر الضرب وانا عنيا فى عنيه منطقتش كلمه واحده ... يمكن يكون هو خاف منى ؟ مش عارف ؟؟؟؟؟؟
من يومها ..... وانا بقوم من النوم مفزوع
لا لا والله ده مش فيلم ابناء الصمت

جينات جزماويه

ليه يومين عمال قول هاكتب هاكتب ومش عارف هاكتب ايه ولا بتدى ازى والله الا وانا مشى فى الشارع افتكرت موضوع الجزمه وعلاقه العائله الكريمه بيها زمان ...

ابويا زمان اتخانق مع ام اشرف للى ساكنه فوقينا علشان الغسيل نقط علينا من فوق معرفش ابويا كان بيكره الناس دول من زمان ليه عمره ما تفق معاهم هو صعيدى طبعا وهما متغربين من بلاد فى شمال الدلتا بياكلوا عيش فى نفس الشركه للى بيشتغل فيه ابويا

يعنى مش عارف ايه فكرة الاضطهاد دى ؟ ابويا كان دايما على ا قل سبب عايز يتخانق معهم مش مهم المهم فى الموضوع الجزمه

جم الناس الكبيره اللى فى العماره وعايزين يصالحوا ابويا على ام اشرف وابو اشرف الموضوع فيه لقعده برضوا ماكنش هادى يعنى كان فى احتداد من كلا الطرفين انا نفسى مكنتش فاهم ايه ا لفكره دى ؟ يعنى المهم الناس فى القعده معرفش اذا كان طلعوا ابويا غلطان ولا مش غلطان المهم يعنى انا مكنتش فاهم الموقف انتهى على ايه بس بصيت لقيت ابويا وشه زنهر كده وهو اسمر طبعا وكلاه الشمس من الشغل طول النهارفى الشركه والزيت والبنزين يعنى حاجه كده صعبه تصعب عليك المهم قوم ابويا راح باصص تحت الكنبه اللى هو قاعد عليها والناس قعده وام اشرف وابوا شرف وعيالها واشرف نفسه وام صلاح وابوصلاح وعم عز اللى فى الدور التانى وكمان ابو ماهر اللى فى الدور الرابع ناس كتير جدا لقيت ابويا قام واخد الجزمه اللى بيشتغل بيها فى الزيت والشحم وراح نازل على وشه ضرب مش عايزا وصف اللحظه دى شكلها ايه ومش عارف اوصف الناس كانوا يعنى كأن كل واح منهم هو للى اضرب بالجزمه لا لا لا مش كده كائن كل واحد فيهم مدلوق عليه جردل مايه الناس مشيت فى صمت كائنها جنازه . ابويا عمل كده ليه ؟ مش عارف ممكن تكون كريزما دفاع عن نفسه لانه طلع غلطان ؟ ولا ممكن تكون فكره علشان يخوف بيها لناس اللى قدامه انهم يمشوا ويقولوا عليه مجنون وابعدوا عنه لانه ممكن يعمل كده مع اى حد ؟ انا بصراحه عيطت على ابويا برضوا معرفش ليه ؟. المهم تمر السنين على الموقف ده وانا والله مش فاهم ايه اللى خلى ابويا يعمل كده

وانا هنا فى الشغل حصل موقف بينى وبين البنت اللى بتشتغل معايا بس الصراحه انا كنت غلطان بس تفاصيل الموضوع بينى وبينها مش مخلينى شايف نفسى غلطان وكمان الموضوع بيرتبط بالمشاعر فعلا انا مش غلطان لما تلاقى حد يسخر من مشاعرك و يحسسك انك انسان مش موجود فى حياته اساسا ده حاجه تجنن انا هاحكى التفاصيل بعدين المهم الشخص اللى كان سبب الخناقه جانى الساعة تلاته باليل يقولى ايه اللى حصل ؟ قولتلك اللى حصل. قالى مش المفروض انك تعمل كده مش المفروض انك تدخل فى تفاصيل حياتها اللى غايظنى انه مش فاهم حاجه وهو مش عارف انا بعمل كده ليه وخصوصا البوح بالمشاعر فى بلاد عقيمه زى دى يخليك تروح السجن او الناس تاكل وشك وكمان لما يكونواعارفين عنك انت مين؟ وابن مين؟ ومن عيلة مين؟ وتفصيل تانيه طبعا صعب صعب الصراحه ضغط على اعصابى جدا المفروض او الظاهر فى الكادر ان الشخص ده صاحبى لانه وقف معايا فى محنه بس مش معنى ان كل شخص وقف معاك فى محنه يبقى صاحبك يعنى مش المفروض ان الحاجات تبقى مفروضه عليك اه وقفت جنبى بس مش معنى كده امتلكتنى وامتلكت تصرفاتى طبعا بان عليه انى مجنون انا مقولتش الكلام اللى فت ده له الكلام ده كان كله جوايا يعنى بخزن بخزن

ورحت بكل هدوء قالع جزمتى اللى ليها اربع سنين معايا طبعا مش عارف اصور شكلها ازاى ورحت ضارب نفسى بيها مرتين على وشى للى بقول انه صاحبى معرفش وشه اتغير ازاى وجاب ميت لون راح قايم من مكانه وقلى ماشى وكان معاه حاجات اخدها من المكان ومشى

بعد م مشى قعدت افكر انا ايه اللى انا عملته ده ؟ وعملته ليه؟ وعلشان ايه؟ انا اتصرفت كده مش فاهم ؟ انا نفسى مش فاهم يمكن جوايا جينات وراثيه مرتبطه بموضوع الجزمه................ ههههههههههههههههههههه

والله مش عارف

بدايه ممكن تقبلونى ؟

بترسم ورا الشباك شجره خضرا
وورا الشجره شمس
وورا الشمس سما مش باينه
متغطيه بخطوط
وبعدين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
الفرشه من غير لون
..................................................................................
وشك فى المرايا كل صبح
بيركهوه الناس
عارف ليه ؟
مش المفروض انك تقوم من النوم مكشر
يعنى تبتسم ازى ابتسامه عبيطه كده
مش عارف اكتبها ولا ارسمها
لا دى ولادى .......................
مش المفروض انك تقوم من النوم اصلا
...........................................................................................
تعب شديد
دى جمله انا بقولها دايما
لما حد يقولى مالك ؟
مالى يعنى ؟
تعب شديد
.................................................................................
سعات بدور على اسباب للغيره اللى جوايا
وعلى النار اللى بتقيد في
بسبب ان البنت بتكلم واحد على النت
قولتلها احترمينى
قالت عادى
قولت ازاى عادى ؟
قالت : يعنى عادى
اول امبارح فصلت كابل الشاشه من الكموبيوتر على شان بصيت على رساله كاتبها واحد صاحبى ليها
يعنى كان بيقرطسنى
ضحكت على نفسى
عارفين ليه ؟؟؟
مفيش حاجه اسمها مشاعر
عادى
.............................................................................................
ههههههههههههههه
ساعات احب اضحك زى العبيط كده
بتكيف من نفسلى اوى اوى
عارفين ليه علشان انا فعلا عايز
ابقى عبيط مش عارف
.........................................................................................
وبعدين ؟
انا تعبت
هاحاول اكتب بكره موضوع جد شويه
بس والنبى اقبلونى

حكايه ....ماقبل النوم

نامى قليلا يا صغيرتى نامى قليلا
هووووو هووووو هووووووو
البنت التى كانت ترتب بيتها الصغير, وتكتب على جدرانه حروف مبهمه
كتبت على بابه ......(بيتى
ليل مفعم بالحلم, ووجه الحبيب
تفاصيله
ملامحه
مسام جلده
كلها حلم
البنت يا صغيرتى خلعت عنهاالشريط الاحمر من شعرها
وذابت فى تفاصيل بلون الورد فى خدها
وغمازتين ساعه الابتسام
رتبت بئناملها التداوير
هى البنت يا صغيرتى لم تعد بنت
حين لامست اسرارها ارتعشت
ليل مفعم بوجه رجل وصور وتفاصيل صغيره
لا احكيها لصغيرتى
تزينت بلون الورد
وبعطرشعرها
وتاج من لؤ لؤ
لكن يا صغيرتى
لم ياتى الحبيب ولا طيف الحبيب
نامى قليلا يا صغيرتى
نامى قليلا يا حبيبتى
الان الصمت خيم
سيدخل من شرفتى
ليرتد صدى صمت جديد
استريحى الان
لان الوقت داخلى لا يستريح
تخلصى من نزف الكلام , ومن صورتى , ومن بقا يا وجهى
استريحى الان
واكتبى اسمى فى دفتر الدرس
وفى دفاتر ذاكرتك التى لم يراها سواى
استريحى الان استريحى
استريحى
هوووووووو هوووووووووو هووووووووو
..................................................................................