فاطمة لسه بتحب

فاطمه لسه بترتب حلم صغير
على مخدة ليل بيطول
بتفك ضفيرة قلبها للفارس
ابو سيف مكسور
وبتركب معاه
لا بيتحرك
ولا شعرها بيطير
مكسور
مكسور الحلم يا فاطمه
فاطمه لسه بتضحك
يااااااااااه
تضحك بمراره
لسه عنيها بتدارى الصرخه المشروخه
بتنادى بصوتها الارابيسك
ع الواد الطالع لمداها
الاه مكتومه فى حض الاه
مسكينه يا فاطمه يام النظره المحتاره
فاطمه لسه بترتب ليلة عشق
بتولع فيها الشمع
وبترمى مرارة خوفها من الشباك
بتغنى اغنية لفيروز
وبتبعت ريحتها للحلم
وتكتب على مرايتها بقلم الروج
حرفين
وبينهم قلب ..... فاطمه يا ناس لسه بتحب .