تاج من انجى ( المهم هات من الاخر . )

التاج ده الدكتورة انجى اديتنى فيه مساحه انى اجاوب عليه بحكم انى من المهتمين بمتابعة مدونتها الرائعه ...
اسمك :
ممكن من غير اسم ؟ الاسم / مسافه على
المشهور بيه وسط اصحابك؟
الفنان واسامى كتير بتعدى عليه بس مش بتلزق زى ... فلفل . منقاريوس . زوسر . غيبوبه . كتير والله مش فاكرهم
- مجال دراستك؟
انا وصلت لحاااااااااااااد ثانوى عام واخدتها ووقفت ... ممكن اكون خرجت برا منظومة التعليم ... بس بحاول اتعلم
- اسم مدونتك؟
تكوين
صورتك الرمزية بتعبر عن ايه ؟
اللوحه دى لوحتى انا اللى راسمها ... بتعبر عن حالة انتظار لنور مش هايجى ( كئيب مش كده ) ؟
هل فكرت فى اغلاق مدونتك ؟ والسبب ؟
لالالالا خالص ... لانى برتاح هنا .
ايه رد فعلك لو حد قل ادبة فى التعليق .؟
ببتسم ... ومقدرش ارد غير بصمت .
اسواء مدونه ؟
بتاعتى .
هايحصل ايه للميل بعد ما تموت ؟
مش عارف ...
اديت الباسورد لحد قبل كده ؟
فى ناس ضغطت عليه .. بس ماحصلش
السفر بالنسبة لك ايه ؟
اجمل ايام حياتى قضيتها فى السفر .... بقى دلوقتى حلم
المود بتاعك ايه ؟
كئيب ومحبط .
بتعمل ايه فى وقت فراغك ؟
القراءة فى المسرح بالتحديد بكل مجلاته ... الرسم ... الكتابه ... هوس افلام اجنبى ... بقضيها احيانا كئيب
الصفات التى اخذتها من والدك ؟
التسرع .. الله يرحمه
الصفات التى اخذتها من والدتك ؟
الطيبة , والنظافه . الله يرحمها .
اكتر حاجات بتكرهم ؟
الاستغلال . المكر . الكذب . والمواعيد المفتوحه . والانتظار . والاحساس بالذنب . والانا . وبكام . والاستهتار فى الشغل . الاقلال من القدر . الغباء .
اكتر حاجات بتحبهم ؟
بناتى .... وفنى . وحاجات راحت ومرجعتش .. وحجات بحلم بيها ...
شخصيتك نوعها ايه ؟
بيقولوا عليه ... عيل طيب ( اهبل ) ... ومحترم زياده عن اللزوم ..
لماذا دخلت عالم التدوين ؟
الفضول من ناحية .. وبصراحه بقى ادمان ... انا بحب التدوين اوى ... وكان نفسى اتعرف على ناس جديده تحترم دماغى .
اجمل كلمة قيلت فى وصف مدونتك ؟
استمر ...
احلى بوست كتابته ؟
عمرى ما كتبت حاجه وكنت حاسس انها حلوه
افضل مدونه قريتها ؟
لحد دلوقتى ( المهم هات من الاخر )
افضل بوست قريته ؟
كتير جدا مش فاكر
الشغل بالنسبالك ايه ؟
اى شغل فيهم ؟ انا بشتغل حاجات كتير ... بس اللى بيجيب المم ( الاكل يعنى ) كرهنى فى حياتى وكرهنى فى الناس . مجبر اخاك لابطل
الانترنت بالنسبالك ايه ؟
خرووووووووووووج
تمرر التاج لمين ؟
كل الناس اللى مهتمه بيه واللى مش مهتمه بيه ودول اكتر