عنيك بتكرمش النور الوالع ع السلم
بتتحداك تطلع تفاصيل الخطوه على اخر
عتبه فى عمرك
وعنيه المفتوحه ف صدرك
بترميك لتفاصيل الواد الهارب
من همك
على همك قال همك ناقص
ولا يهمك
انا واقف مستنى
انا مش مستنى غير انك ترتاح
فى براح معكوس فى مراية
جوايا سلايه
جوايا فراقك غلايه
سامح صوتى العالى
خوفى منك
مع انك مش سايب غير الذكرى
مش سايب غير الفكره اللى تخوف
مرجوفه الفكره
محتاره كل الحاجات اللى فى بكره
اول مره اكره بكره يا بويا
اول مره احس بصوتك م الشباك متحاش
اول مره احس ضلوعى محتجاك
تسرق منها الفكره
تسرق منها انك مجرد ذكرى
صوتك الوتد اللى ربطت فيه فزعة نومى
ورغيف العيش الحاف
شوية دقه تشفى همومك وهمومى
محتاجك
محتاجك محتاجك
رغم سكاتك عنى محتاجك
تعدى فى الشارع
خاصمنى
وكشر وشك فيه
انفينى حتى من براح جواك
واياك تثبت فكرة بكره
انك مش راجع
انك مش ناوى
تعجن بصوابعك قزاز البيت
وتنادى ( يا واد )
وترد بناتى
على جدو الطالع من غشاوة روحهم
بترد بناتى
على ادين جدو الخشنه
اياك انك تقول مش جاى وتثبت نفس الفكره
انك مش راجع
ومش هتراجع معايا تفاصيل قلة حيلى
تعالى وانا اشيل من بكرة ( القروانه )
تعالى بس وانفى الفكره
من راس الناس اللى سألتنى عنك
وقولهم ( هاصلى المغرب وارجع )
من نفس الشارع
واعد كل الحصى
واحسب كل الخطى
قول انك راجع من نفس الشارع
ارجوك انفى الفكره
من راس اخواتى
وقول انك مش هاتقسم ارضك جسمك
قول ان عروقك موصوله بكل هدومك
ومش هاتسلخ جلدك
او انك ممكن تتنازل عن
الطاقة فى بيت امك
انفى الفكره يا بويا انفى الفكره
علشان بكره سافر معاك ومش راجع
ماليان مواجع ومليان اسرار
كانت تدارى
جوه عنين العيال العاصيه
جوه قلوب الولاد القاسيه
لما تسمع صوتك
انفى فكرة انك ملفوف فى بياض
ورجع البس جلابيتك الصوف
اطرد كل الخوف من بيتنا الضلمه
واشرب شايك مع ريحة امى
وحيد زى ماكنت
شارده عنيك على اخر صوره ليك
انفى الفكره من جوايا
ومن جواك
علشان اقدر ارسم صوره لبكره
انت فيها ابويا
مش انت مجرد ذكرى
انفى الفكره
علشان ارتاح فى براح مات
من ساعة م قفلت شباك شوفك على عينى
دفينى علشان مقطعش النفس
دفينى علشان ارتاح
ارتاح فى براحك اللى انت مصر
على انه مات
مات
مات
هناك 10 تعليقات:
مش عارفه اقولك ايه
الكلام و الاحساس اصدق من انى اعلق عليه
الموت حق
والفراق حق
ولابد من الفراق
فى يوم من الايام
وزى ما قرأت عند صديق
أن الحياة طالت ام قصرت
فهى رحلة لابد من الوصول الى
النهاية فيها .
تحياتى
لك
ولكلماتك
وارجو أن يهبك
الله الصبر على الفراق.
دايما بيكون الفراق صعب
ولا تتحمله اى نفس بشريه
اسال الله ان يلهمك الصبر
كلماتك اثرت فيا كتير
مع تحياتى
ربنا يصبرك
ويرحم والدك
اولا
ازاي مشوفتش مدونتك قبل كده
انت مدهش
ثانيا
نحن في الفقد واحد
أقول دائما
الفقد أبشع ما في الموت من ألم
اشهد ان لا اله الا الله وحدع لا شريك له وان محمدا عبده ورسوله
وان الساعه حق..والجنه حق والنار حق
والموت حق..
الا انى لا استوعب ان من يموت لن يأتى بعد فتره ما ليكون معنا وبيننا!!!
ربنا يرحمه برحمه واسعة
وشد حيلك انت بقى .. كلنا هانموت
لان الموت حق.. وهو الحقيقة الوحيدة
في حياتنا
ربنا يصبرك
السلام عليكم
رحم اله والدك والهمكم الصبر واسكنه الله الفردوس الاعلى
ويبقى الاحبة فى القلب طول الزمان
الكلام الصادق هو اروع الكلام
تحياتي ليك
ولوالدك الرحمه والمغفره باذن الله
هاقولك حاجات يمكن ناس كتيره قالوهالك
ويمكن سمعتها كتير
بس ارجوك اسمعها مني وماتزهقش
انا مجرب احساس الفراق لناس بتحبهم
لكن اكيد مش هاقدر اقولك باللي انت حاسس بيه دلوقت
اذا مات ابن ادم انقطع عمله الا من ثلاث
صدقة جارية - علم ينتفع به - او ولد صالح يدعو له
صدق رسول الله صلي الله عليه وسلم
خليك انت الولد ده
فلا رد لقضاء الله
قلبي معك
تحياتي
هقولك ايه
معنديش اى كلام عشان اى رد او مواساة هتبقى اسخف من انها تتقال
الله يرحمه رحمة واسعة ويصبرك ويعينك على فراقه
واكيد هتتقابلوا تانى بس الاكيد اكتر انكوا هتتقابلوا فى مكان احسن
الله يرحمه
إرسال تعليق