عنيك بتكرمش النور الوالع ع السلم
بتتحداك تطلع تفاصيل الخطوه على اخر
عتبه فى عمرك
وعنيه المفتوحه ف صدرك
بترميك لتفاصيل الواد الهارب
من همك
على همك قال همك ناقص
ولا يهمك
انا واقف مستنى
انا مش مستنى غير انك ترتاح
فى براح معكوس فى مراية
جوايا سلايه
جوايا فراقك غلايه
سامح صوتى العالى
خوفى منك
مع انك مش سايب غير الذكرى
مش سايب غير الفكره اللى تخوف
مرجوفه الفكره
محتاره كل الحاجات اللى فى بكره
اول مره اكره بكره يا بويا
اول مره احس بصوتك م الشباك متحاش
اول مره احس ضلوعى محتجاك
تسرق منها الفكره
تسرق منها انك مجرد ذكرى
صوتك الوتد اللى ربطت فيه فزعة نومى
ورغيف العيش الحاف
شوية دقه تشفى همومك وهمومى
محتاجك
محتاجك محتاجك
رغم سكاتك عنى محتاجك
تعدى فى الشارع
خاصمنى
وكشر وشك فيه
انفينى حتى من براح جواك
واياك تثبت فكرة بكره
انك مش راجع
انك مش ناوى
تعجن بصوابعك قزاز البيت
وتنادى ( يا واد )
وترد بناتى
على جدو الطالع من غشاوة روحهم
بترد بناتى
على ادين جدو الخشنه
اياك انك تقول مش جاى وتثبت نفس الفكره
انك مش راجع
ومش هتراجع معايا تفاصيل قلة حيلى
تعالى وانا اشيل من بكرة ( القروانه )
تعالى بس وانفى الفكره
من راس الناس اللى سألتنى عنك
وقولهم ( هاصلى المغرب وارجع )
من نفس الشارع
واعد كل الحصى
واحسب كل الخطى
قول انك راجع من نفس الشارع
ارجوك انفى الفكره
من راس اخواتى
وقول انك مش هاتقسم ارضك جسمك
قول ان عروقك موصوله بكل هدومك
ومش هاتسلخ جلدك
او انك ممكن تتنازل عن
الطاقة فى بيت امك
انفى الفكره يا بويا انفى الفكره
علشان بكره سافر معاك ومش راجع
ماليان مواجع ومليان اسرار
كانت تدارى
جوه عنين العيال العاصيه
جوه قلوب الولاد القاسيه
لما تسمع صوتك
انفى فكرة انك ملفوف فى بياض
ورجع البس جلابيتك الصوف
اطرد كل الخوف من بيتنا الضلمه
واشرب شايك مع ريحة امى
وحيد زى ماكنت
شارده عنيك على اخر صوره ليك
انفى الفكره من جوايا
ومن جواك
علشان اقدر ارسم صوره لبكره
انت فيها ابويا
مش انت مجرد ذكرى
انفى الفكره
علشان ارتاح فى براح مات
من ساعة م قفلت شباك شوفك على عينى
دفينى علشان مقطعش النفس
دفينى علشان ارتاح
ارتاح فى براحك اللى انت مصر
على انه مات
مات
مات
