اخر حلم
تقف عريان فى الشارع
وتنادى على كل اصحابك
يلموا شجاعتك من تحتك
ويعبوها فى عيونهم
تصرخ على اخر مدى عندك
وتقول : انا عايش
لانك
عمرك ما هتقلع عريان
وهاتعيش العمر جبان
..........................
اخر صوت
غموا عنية
مابقتش غير الريح
وزرار التليفون الارضى
بيتكتك جوه ودانك خايف
عارف ... عمرك ما هتكون انسان
عارف .... انت جبان
زى رعشة الريح جوه ودانك
والتليفون اللى قال انك مدان
..................................
اخر ريحه
نشفت كل عرقى
و البنت فردت المنديل
نام جواك الحلم
واتغطيت بالتفاصيل
من لمسة ايدها
لحااااااااااااااااد
لمسة ايدها
حضنت كفى
ولفتنى لفتنى
علشان تاخد عرض كتافى
اخر ريحة شمتها
الورده الدبلانه لما وقعت
من جوه كتابى
...........................
اخر سفر
من شباك القطر
رميت الدبله
وحطيت الصوره ع الرف
وكتبت
كل اغانى الفرقة واتشحتفت
كأن عمرى ما هاوصل
وكأن الطريق مش بيوصل
وجانى صوت الكمسارى
تذكرة الاخ ؟
فنزلت .
.................................
